ރައްކާތެރި ގޮތުގައި ޕްލާސްޓިކް ނައްތާލުމާއި ގުޅޭ މަޢުލޫމާތު ދިނުމުގެ ބައްދަލުވުންތަކެއް އުލިގަމުގައި ބާއްވައިފިއެވެ.

މި ބައްދަލުވުންތަކަކީ ބައިނަލް އަޤްވާމީ ދެ ޖަމިއްޔާ ކަމަށްވާ ލިވް އެންޑް ލާން މޯލްޑިވްސްއާއި ރިސަރޗް ޓްރޭންގަލް އިންސްޓިޓިއުޓް ގުޅިގެން ކުރިއަށް ގެންދާ "އޯޝަން ޕްލާސްޓިކް ރިޑަކްޝަން އެކްޓިވިޓީ"  މަޝްރޫޢުގެ ތެރޭގައި ހިމެނިގެން ހިންގާ ހަރަކާތުގެ ތެރެއިން ކުރިޔަށް ގެންދިޔަ ބައްދަލުވުން ތަކެކެވެ.

5 އަހަރުގެ މުއްދަތަށް ހއ އަތޮޅުގައި ކުރިޔަށްގެންދާ މި މަޝްރޫޢުގެ ތެރެއިން ބޭއްވި މި ބައްދަލުވުން ތަކުގައި ތިމާވެއްޓަށް ގެއްލުންދެނިވި ޕްލާސްޓިކްގެ ބާވަތްތައް ދެނެގަނެ އެފަދަ ބާވަތްތަކުގެ ޕްލާސްޓިކު މަދުކުރުމަށް މަސައްކަތް ކުރުމާއި ރައްކާތެރި ގޮތުގައި ޕްލާސްޓިކް ނައްތާލުމަށް ކުރެވިދާނެ މަސައްކަތްތަކާ ގުޅޭގޮތުން މަޢުލޫމާތު ދެއްވާފައި ވެއެވެ.

މިމަޝްރޫޢަކީ ޔޫ.އެސް.އޭ.އައި.ޑީ ގެ މާލީ އެހީތެރިކަމާއިއެކު މިނިސްޓްރީ އޮފް އެންވަޔަރަންމަންޓް، ކްލައިމެޓް ޗޭންޖް އެންޑް ޓެކްނޮލޮޖީގެ އެއްބާރުލުމާއެކު ކުރިޔަށް ގެންދެވޭ މަޝްރޫޢެއް ކަމުގައި ލިވް އެންޑް ލާން މޯލްޑިވްސްއިން މަޢުލޫމާތު ދެއްވައެވެ.

މި މަޝްރޫޢު ކުރިޔަށް ގެންދިޔުމަށް ހއ. އަތޮޅުން ހޮވައިލެވުނު ރަށްތަކުގެ ތެރޭގައި ހއ. އުލިގަމުވަނީ ހިމެނިފައެވެ.  މިހިނގާ ޖެނުއަރީ މަހުގެ 19 ވީ ބުރާސްފަތި ދުވަހު ލިވް އެންޑް ލަރން މޯލްޑިވްސް އިން އުލިގަމަށް ކުރި ޒިޔާރަތުގައި އުލިގަމުގެ އެކިއެކި މުއައްސަސާތަކާއި ޒުވާނުންގެ ތެރެއިން ބަޔަކާއި ބައްދަލުކޮށް މަޢުލޫމާތު ޙިއްޞާ ކޮށްފައިވެއެވެ. އަދި އުލިގަމުގެ ވަގުތީ ކުނިކޮށްޓަށް ޒިޔާރަތްކޮށް ކުނިނައްތާލުމުގެ މަސައްކަތް ކުރިއަށްދާގޮތް ބައްލަވައި ލައްވާފައިވެއެވެ.